Moisés Durán, xerente de Servizo Público de Renfe en Galicia, subliñou durante o seu discurso de agradecemento do 13º Premio Dano Cerebral Galicia - Miguel Blanco que 7.400.000 persoas viron nos seus trens as imaxes da campaña 'Non se pode previr o que non se coñece'. Unha campaña de concienciación sobre o dano cerebral adquirido centrada nas secuelas invisibles que foi a principal causa de que a Xunta Directiva de Dano Cerebral Galicia acordara entregar o seu galardón anual a Renfe Viajeros, nunha cerimonia que tivo lugar o 22 de abril no marco da III Xuntanza de persoas e familias con dano cerebral adquirido.
A inscrición na actividade formativa, que se desenvolve desde hoxe, 7 de maio, ao 1 de xuño, aínda está aberta e é gratuíta.
AS NOSAS ASOCIACIÓNS
Dano Cerebral A Coruña ADACECO
O acto de conmemoración do 25 aniversario de Dano Cerebral A Coruña ADACECO encabeza o seu último boletín dixital. A cadea humana con forma de número '25' celebrou o cuarto de século de traballo polo dano cerebral.
Dano Cerebral Lugo
Dano Cerebral Lugo organizou a súa 1ª Xuntanza Inclusiva con alumnado de secundaria. Consistiu nun encontro de convivencia con estudantes do IES da Terra Cha no que houbo deporte, actividades e xogos adaptados.
Alento
Alento celebra un Festival Solidario polos seus 25 anos no que, entre outras actividades, van preparar a tortilla máis grande da historia de Vigo. Será o 24 de maio en Navia, desde as 17:00 ata as 23:00.
DCA Ourense
Obradoiro de Memoria: unha oportunidade para o benestar das persoas con dano cerebral. DCA Ourense organiza semanalmente sesións grupais de estimulación cognitiva nas que se traballan a atención e a concentración.
Dano Cerebral Santiago de Compostela
Dano Cerebral Santiago de Compostela cumpre o 19 de decembro 25 anos dedicados a axudar, apoiar e sensibilizar sobre o dano cerebral. Para celebrar este fito, preparan unha serie de actividades e eventos especiais.
Dano Cerebral Galicia colabora co Colexio Maior San Agustín, en Santiago de Compostela, para ofrecer unha bolsa dirixida a estudantes de novo ingreso nunha titulación oficial de grao na Universidade de Santiago de Compostela (excluído o campus de Lugo). Esta bolsa está destinada á estadía universitaria durante o curso 2025/2026. Consulta aquí os requisitos e prazos (solicitude aberta ata o 31 de maio!).
Cada ano a Administración permite que as e os contribuíntes decidan o destino do 0,7% dos impostos que se recadan mediante o IRPF. Marcando o cadro 106 de ‘fins sociais’ garantes que esa porcentaxe dos teus impostos se dedique a entidades sociais que realizan proxectos con colectivos en situación de vulnerabilidade, como as persoas e familias con dano cerebral adquirido. Lembra, nin pagas máis, nin che devolven menos.
Dano Cerebral Galicia
Rúa Galeras, 17, 2º, oficina 5 - 15705 Santiago de Compostela
