Se non podes ver ben este boletín, preme aquí

Mércores, 04/03/2026

Convenio coa Consellería de Educación para a mellora da atención ao alumnado con dano cerebral adquirido

Asinamos un novo convenio coa Consellería de Educación para mellorar a atención ao alumnado con dano cerebral adquirido. Desde 2022 chegamos a máis de 2.500 nenos e nenas coas nosas iniciativas para centros de ensino, que continúan este ano no marco do acordo coa Consellería: obradoiros Os Bolechas 'Mireia conta que é o dano cerebral adquirido', Fast Heroes, boccia, e máis novidades, como o acompañamento educativo.

Formación sobre 'Apoio de persoas con dano cerebral en residencias non especializadas'

Programadas dúas edicións, nos centros Servisenior Brión e Emera Group (Vigo), que tamén están abertas ao público xeral.

Organizamos dous obradoiros de produtos de apoio para persoas con dano cerebral

Impartidos pola terapeuta ocupacional, inclúen asesoramento individualizado e información sobre recursos de préstamo.

Continúa o ciclo de charlas de 'Aproximación ao dano cerebral' en Cambados

A sesión informativa terá lugar o 17 de marzo; presentouse nunha rolda de prensa no Concello do Salnés.

Dano Cerebral Estatal publica o seu caderno 24, sobre autonomía persoal a través do ocio inclusivo

O grupo de traballo contou coa presenza de profesionais de Dano Cerebral Galicia e Dano Cerebral Santiago de Compostela.

AS NOSAS ASOCIACIÓNS

O boletín de Dano Cerebral A Coruña ADACECO está cargado de actividades solidarias, como o Festival Intercentros e o Taller Solidario das persoas socias do Espazo +60 de Afundación, que cedeu á entidade a súa recadación.

Dano Cerebral Lugo colabora coa Fundación Breogán en accións de sensibilización escolares. As sesións informativas reservan un tempo para falar do deporte adaptado e presentar a boccia ao alumnado.

As persoas usuarias de Alento escolleron o espectáculo teatral 'No pasarán', na sala Ártika, para gozar do seu espazo de ocio cultural na comunidade. Acudiron, en dúas sesións, 25 persoas con dano cerebral.

'Grolos con textura': a abordaxe da disfaxia orofarínxea no dano cerebral adquirido. A asociación DCA Ourense explica a amplitude do labor dos equipos de logopedia a nivel de deglutición e de hidratación.

Posta en marcha do novo servizo de Podoloxía para persoas usuarias (proporcionado externamente polo podólogo Miguel Pumares Núñez), a través dunha sesión informativa inicial en Dano Cerebral Santiago de Compostela.

'Ictus' continúa a súa andaina polos escenarios con sesións ata maio

A obra de teatro 'ICTUS (a derradeira leición do Dr. Castelao)', do grupo Chévere, estreouse en Santiago o 20 de febreiro -coa presenza dunha delegación de Dano Cerebral Galicia- e continúa a súa xira polos escenarios galegos contribuíndo á sensibilización sobre o dano cerebral, discapacidade que ten a protagonista da peza.

O boletín de Actualidade do Dano Cerebral fai hoxe 200 edicións!

O que acabas de recibir na túa caixa de correo é o boletín número 200 de Actualidade do Dano Cerebral Adquirido en Galicia. Grazas por acompañarnos nesta andaina, se nos segues desde o inicio, con periodicidade quincenal, ou se acabas de incorporarte á familia de Dano Cerebral Galicia. Agardamos que che guste!

Dano Cerebral Galicia

Rúa Galeras, 17, 2º, oficina 5 - 15705 Santiago de Compostela

881 943 148 • 659 177 709

Darme de baja